తెలంగాణ ఉద్యమాన్ని సీమాంధ్ర ఉద్యమకారులు కాపీ కొడుతున్నారా?

వీక్షకులకు స్వాతంత్ర్యదినోత్సవ శుభాకాంక్షలు

          4,5 రోజుల నుండి తెలంగాణా నాయకుల నుండి ఈ కామెంట్ ఎక్కువగా వినపడుతుంది. ఎవరి ఉద్యమాన్ని ఎవరు కాపీ కొడుతున్నారు? బాధ కలిగితే ఏడుపు సహజం.ఒక్కొక్కరి గొంతు ఒక్కొక్కలా గా ఉంటుంది. తెలంగాణా నాయకుల గొంతు పెద్దగా ఉంటుంది కాబట్టి వారిది కొంచెం పెద్దగా వినిపిస్తుంది.

         ఒకసారి చరిత్ర లోకి వెళితే తెలంగాణాలో(నైజాంలో) తెలుగు వారు తీవ్రంగా అణిచివేతకు గురైన సమయంలో మొదటి గ్రంధాలయం పెట్టిన కొమర్రాజు లక్ష్మణరావు గారు ఆంధ్రడే. గ్రంధాలయాల స్ధాపన, పుస్తక ప్రచురణ ఒక ఉద్యమ స్ధాయిలో నడపటానికి ధన సహాయం,నైతిక మధ్దతు తెలిపింది ఆంధ్రా ప్రాంతం వారే. తెలంగాణా సాయుధ పొరాటానికి కావలసిన శిక్షణ, ఆయుధ సహాయం, తలదాచుకోవటానికి అవకాశం కల్పించిందీ ఆంధ్రులే! ఆ రోజుల్లో విజయవాడను స్టాలిన్ గార్డ్ అని కమ్యూనిస్ట్ లు పొగుడుకునేవారు. దీనికి ముందు తెలంగాణాలో రాజకీయ శిక్షణా తరగతులు నిర్వహించిన చండ్ర రాజేశ్వర రావు, పుఛ్చలపల్లి సుందరయ్య మొ. వారు ఆంధ్రులే. తెలంగాణా ప్రాంతం ఆయుధపోరాటం మొదలు పెట్టే దశలో ఉన్నప్పుడు ఆ ఉద్యమానికి ఊపు, ఉత్సహం ఇచ్చిన ఆంధ్ర ప్రాంతానికి ఈనాడు తెలంగాణా ఉద్యమాన్ని కాపీ కొట్టవలసిన అవసరం ఉందా?

       తెరాసా నాయకులు శ్రీ KCR గారు నక్సలైట్ అజెండా మా పార్టీ ఆజెండా అంటున్నారు. నక్సలిజం ఎక్కట పుట్టిందో టి.నాయకులు మరచినట్లున్నారు. ప్రపంచం దృష్టిని ఆకర్షించిన శ్రీకాకుళ సాయుధ పోరాటంలో పుట్టింది. ఆ సమయంలో చార్ మజుందార్, కాను సన్యాల్ మొ. వారు గుంటూరు జిల్లా గుత్తికొండ బిలంలో నక్సలైట్ ఉద్యమ పధాన్ని నిర్దేశించారు. శ్రీకాకుళం, గుత్తికొండ తెలంగాణ ప్రాంతంలో ఉన్నాయా? ఇది ఉద్యమం కాదు, అభూత కల్పన కాదు. నక్సలిజం ఒక ఉద్యమ స్థాయిలో నడిచిన ఆంధ్ర ప్రాంతం తెలంగాణా ఉద్యమాన్ని కాపీకొట్ట వలసిన అవసరం ఉందా?

    విజ్ఞులైన తెలంగాణా మేథావులకు విన్నపం ఏమంటే, నొప్పి పుట్టిన వాడు ఎవడైనా ఏడుస్తాడు. మీరు సకలజనుల సమ్మె చేసినప్పుడు ఆంధ్ర ప్రాంత ఉద్యోగులు సహకరించారు. వారు చేస్తున్నప్పుడు మీరు సహకరించండి లేదా చూస్తూ ఊరుకోండి. అంతేకానీ రెచ్చగొట్టే మాటలు మాట్లాడటం వల్ల వారికి ఉద్యమ స్ఫూర్తిని ఎక్కువ చేయడం తప్ప మరొకటి కాదు.

          ఉద్యమం ఇంత ఊపుగా జరగటానికి శ్రీ KCR గారికి, V. హనుమంతరావు గారికి, ఈటెల రాజేందర్ గారు మొ. అందరికీ  వందవందనాలు. మీరు ఇదేవిధంగా రెచ్చగొట్టే ప్రకటనలు చేస్తూ ఉంటే మాకు ఉత్సాహం వస్తుంది. మీ అందరికీ వేయి వందనాలు.